مني ومنـك [منى و لينـا]

[لينـا]

تعي تنحكي كلمتين
تنغيِّر الجو شويّ
بلجهتنا نكتب بسمتين
نداعب الحروف بحنية
احكيني..
يمكن تشيلي دمعتين
وحدة بقلبي
والتانية برموش عيني
بمشاعرنا نلوِّن صفحتين
ونغير ألحان الغنيه

منى بانتظارك.....

[منــى]

جيتك يا لينا بمودة

طلبك أغلى من الدهب

تـ نغني ونملّي الدّني

ميجانا وعتابا وعتب

ونخلي الحرف يرقص دبكة

والدمعة خمر العنب

لينا ومنى اسمين

حروفن اقوى من الشهب




بانتظارك لينا

محبتي

[لينـا]

التقينا أو ما التقينا
صوتك بيوصل
متل النسمة بيداعب
...خدي

غنينا أو ما ..غنينا
بالحرف بنعمل لحن
بيجيب خبار
...ويودي

بدي إعزف بالكلمة
تيرفرف قلبي
بلمحة يطير
... ويهدي

تنفسِّر خلجات بخاطرنا
لا حدود تمنع
ولا بدنا واسطة
..ولا عِدّي

دخلك كيف الحرف بِحْركنا.؟
لو ما كان من الروح مكتوب
ومِهدي..




منى أنتظرك عزيزتي..........

[منــى]

لعيونك أحلى الكلمات
مين غيرك يستاهل
صديقة من خيوط الذات
معها بنسى المشاكل
يللا نلعب بالحكيات
تـ يشوفو الحرف مشاتل
من حروفك بحسّ بنسمات
للمعنى ترقّ .. تغازل
قولي وملّي الدّني نغمات
ولحن الهوى شغلنا الشاغل
بيعزفنا .. بيكتبنا سيان
الهوى سلطان ما فينا نجادل



رائعة غاليتي
أنتظرك

[لينـا]

تركنا بلادنا ودموع بالعين
لاجفت ..ولا غاب
أمل بعينيّ

وغربتي صارت غربيتين
لا وطن عرفت
ولاحملت هوية

ريت الجسم بيجمع روحين
وحدة بلبنان بتركا ولفلسطين
روح ..هديه

ومش هّم أحمل بلدين
وعلى لساني يكونوا غنيّه
وهون رح نحكي بصوتين وكل يوم

في... خبرية

يوم قضية بلد وغربة ويوم
مشاعر بالقلب
..مخفية


وناطريتك منى

[منــى]

احكيني يا لينا عن وطن
ساكن فينا ومش غايب
من مطرح ما دفعنا التمن
قهر .. وشفنا العجايب
لو حاسس فينا الزمن
كيف بالغربة نحارب
ولِم نسكت يفتكرو جبن
ويفتكرو المبدأ سايب
ما عرفو انّا من العفن
عم نخترع الأطايب
من الشوق عم نعمل كفن
لقلب بالوطن دايب
وهلأ خلينا بشجن
تــ نحكي عن غير جانب
حب وصداقة ومحن
خلت شباب القلم شايب
احكيني عن
مشاعر مرهونة بحضن
او بلمسة حبايب


لينا رائعة

منـــــى

[لينـا]

من غربة جسم عن بلد
لغربة راحة وهجرة سلام
من ملل بقلوبنا انولد
لسفر بوراق واقلام
خيبات ما الها عدد
وسكبات من الاحلام
ويلي لو الأمل انفقد
وحكايتنا كانت أوهام
لصرنا كمالة عدد
وللكون شوية أصنام
رح كمل واحكي بعد
يا منى غيري الانغام







منى بانتظارك عزيزتي

[منــى]

هلأ جايي بقضية

بتلف براسي وبتدور

يمكن مَنها خبرية

يمكن اللي بيحكي معذور

كيف التميّز بصير هدية

لحروف بتزوّر شعور

وين حقوق الأصالة وينيي \ .... ( أين هي )

اللي بنيت بالشعر عصور

فيه ناس بتزرع بحرفية

تـ تاكل تعبها النسور

وناس بتزرع بفوضوية

وبتلاقي ذنبا مغفور


منـــى


على الودّ نلتقي

أنتظركِ لينا

[لينـا]

وأنا ما بأى فييّ
يا منى خاطري مكسور
الدني كلا سودا
لا دفا فيها ولا نور
لو كنت بعرف كلمة
بتخلي البركان يثور
ما كنت تعلمت الحكي
وتركت الكلام مبتور
رح اهرب مع وراقي
والقلب اتركو مأسور


محبتي منى

[منــى]

يا لينا الدني دوارة

وتجاربها ربح وخسارة

اللي بيكسر خاطر من كلمة

مشاعرو بتكون حجارة

شو بهمّ لو شاف الجنة

وما تمتّع بأزهارا

بهالدني مافي انسان

محصّن ضدّ إعصارا

المهم ان الإنسان ما

يخلط الإحساس بتجارة

تـ تبقى المحبة عنوان

ولو بقلب المغارة

[لينـا]

الحرف اللي بينزفوا قلم
للكاتب عنوان و هوية
مش كل الكلام حَكم
لأسباب معروفي وخفية
والذوق لو يوم انعدم
للحق في حرية
وقلمك يا منى علم
وراياته بالسماء مضوية
اكتبي وخلينا نِنعم
لنطرب بحروفك شوي

منى...احبك ..وأنتظر

[منــى]

هَيك الدّني خلّتنا نقول

هيهات وينك يا قلم

صار بهالمدى خجول

يطرح فكرة من العدم

رخص الإحساس المنقول

لناس تزوّر ختم

وقلمك يا يا لينا مشهور

بالعدل ومحي الظلم

بإحساس بالدفا مغزول

فيه الأصالة والحكم

خلينا ننسى المسؤول

ونطرد بحّات الظلم

شو نفع ضمير مشلول

بيحاول يصطاد الطعم



تسلميلي لنونة

وأنا أحبكِ أكثر

أنتظرك

[لينـا]

كيف بيكون الوفا



والحب كيف بينقاس؟



مش كلمة نقولا وكفى



القصة ترجمة إحساس



صدق ومحبة ودفا



وعطا بدون كرّاس



والمحبة إلا صفة



عطا ود وإخلاص



واللي ما بيعرفا



خسارة يكون من الناس



لينــــا



منى ..وما زلت أنتظر

[منــى]

شو الحب غير الوفا
وتفاني من غير حدود
ورهبة احساس ان غفا
بيرجع أقوى من المعهود
الحب برهانو الدفا
مش وتر وعصب مشدود
ولا حجر يعكر صفا
نهر ساري للخلود
جوابك يا لينا كفا
مشغول بخرزات الجود
شفت اليوم كلمة جفا
عم تتمرجح فوق العود
وبلحظة النغم اختفى
لما فاجأنا المقصود
تهمة باديها اكتفى
انه يبكي عيون ورود
ما عادت تحمل جفا
دموع العين عالخدود



وهنا موعدنا معاً دائماً
أنتظرونا



لينا و منى

[فاطمة الحسن]

راااااائع يا بنات
قرات هالابداع مبيرح
وعجبني كتير
راقي الحوار ودافي
اعذروني لتشويه المتصفح

[منــى]

الغالية فاطمة

شكراً لمتابعتكِ الرائعة لنا

ولكلامك الجميل بحقنا

سنعود للحوار لاحقاً بإذن الله

كل المحبة

[محمد السقار]

كنت هنا
منذ تهادى التغريد الشجي الى روحي
ووقفت بصمت استلذ الانصات الى تلك الاوراح
وهديلها المفعم بالسحر حد التألق

وسوف ابقى على موعد لن اخلفه ابدا
لارتوي من هذا السلسبيل

محبتي وتقديري

[طارق المهاجر]

الرائعات

منى و لينا

اعذراني ان دخلت كل حين

لأتمتع بروعة و جمال ما قرأت هنا

تقبلن مروري

و دمتن بألق

[رنا عمر]

ثُنائية رائعة

متابعين بشوق